E IAI LE SOOTAGA o le taugata o le tau o mea’ai ma

                                 oloa ma le suiga o le tau. Ma o le upu moni, o loo

                                aga’i pea ina taugatā le tau e totogi tatou te nonofo

                            ai i lo tatou paneta. Ae e lei faapena le fuafuaga. O lou lava ofaga mai le Atua, foa’i fua mai, a o lea ua toe totogi le rent? E le sa’o. O le fesili, e totogi ia ai? O le tali, e totogi i le vai, ma le ’ea ma le afi, ma le eleele ua to’atama’i.

      A tuliloa upu o le Tusi, o loo ta’ua ai le lalolagi o se galuega lelei ma le atoatoa na faia e lo tatou Atua mo i tatou. O le parataiso, ofo fua mai. E faigofie upu o le feagaiga, a tatou tausi lelei i ai, na te tausia foi tatou pei se tina agalelei i lana fanau.

      Talanoa mai saienitisi i le tala’aga o lo tatou ofaga. Fai mai o se taimi aupito paleni lenei i lona tala, e fua i isi taimi e iai lena na liua ai i se polo 'aisa (Ice Age), ma isi faapena. E paleni i le ta’otoga o pulega a fetu ma o latou paneta, le va o aniva e faitau miliona ma o latou ta'otoga ma pulega. Lo tatou paneta ma lona pulega, i le va ma lo tatou fetu e faamoemoe i ai lo tatou ola, a ni inisi e felata'i ai, lona uiga ua afaina i tatou. A so'ona malulu, e iloga se a'afiaga. A si’i le vevela i nai tikeri, e faapena foi.

      E lei atoa se seneturi na sui ai e tagata lena paleni, ina ua amata le tausiliga a malo malolosi mo le pule ma le mamalu, ina ua maua le tekonolosi e faatino ai, ma faasaga atu e 'eli le fanua ma suotosina le moana ma sunui le lagi i au vevela o le 'ea palapalā mai fale gaosimea, i le igoa o le 'aga i luma', 'atina'e manuia.'

      E le se mea leaga le atina'e, pe a tuliloa upu o le Tusi, a o le tulaga o le eli se'ia le toe iai se mea e eliina, afaina ai le soifua o tagata, le aia tatau a isi meafaiola e nonofo ai, le fagotaina o le sami se'ia le toe iai se i'a e ta'a ai. Le susunu o le 'ea se'ia mamate la’au ma le toe iai se okesene e manava ai. Le fai pea lava pea se'ia tete'e mai le foafoaga, i le to'atama'i a le matagi, le eleele, le afi ma le vai.

      Mai le va'ai faatausimea lelei, e iai le mea e ta'u o le fai ma le alofa, fai fuafua i le aso ataeao. Ae pei lava o le tala i le faifaato’aga na sauā i lana asini, ua mate ai, alu ane loa lea ua toso le palau, gau ai, ma iu ina maliu ai. Lesona o le tala, ia poto nei loa a o lei tuai.

      O le mataupu i le suiga o le tau lalolagi aoao, ua iai nei i o tatou lumafale ma e le mafai e se poto ona toe faafitia. (O i latou e pei o Donald Trump ma le aufaafitifiti a le lalolagi, e laitiiti lava le aofa'i ae leotetele. Aofia ai ma se pasene feoloolo e talitonu i le suiga o le tau ae faaleano i ai). I le Pasefika nei, ua iloa le le faigofie ona tauilo aga a malosi’aga e fa, i se vasa telē ma le laolao, ona ua si’i le vevela, ua mafua ai ona faafaupu’e le malosi o au ‘a’asa na te taofi, e alu a'e i luga ma gaosia ai matagi malolosi.

      Fai mai se taofi sa fai ma vasa'i maninoa i matagi ta'i tasi tasi, e lei mamao tele atu, a o lenei ua sapotu mai toe o tausaga uma. O molimau manino ia i le tulaga o le tau ua fe'ai ma e o’o ina fe'ai tele.  Sa lei talanoa Niu Sila i ni afa taavivili na o afa fulifao. Fai mai na o Amerika e maua ai, a o lenei ua o’o mai fo’i ma nofomau e le tau faia ni ona pepa.

    Fai mai le palemia fou, Chris Hipkins, o le ulua'i malaia faanatura lenei ua lofia ai Niu Sila i se tulaga pagatia, i se tupulaga. Moni e laiitiiti le afaina i le soifua maumau (11 maliliu e aulia mai lenei taimi), e faatusatusa ma isi faalavelave, ae maualuga lona tau ma le afaina i le tamaoaiga, ae faapea aiga i meatotino, ae le ta'ua isi maumau i tautua e iai falema'i, falea'oga, aemaise aafiaga taulemafaufau.

      E lei mamao atu le tete'e a faifaato’aga ina ua faatu atu e le malo ni suiga e tali atu ai i le faafitauli. Na mafua ai ona aga’i atu ni solo uumi o palau ma taavale i Ueligitone, e faailoa la latou tete'e. Fai mai o le palemia o le tevolo, o le fili. Ua a nei la? O ai le fili? O le fili e le o le ta’ita’i a o i tatou lava. Tatou te faafitia le mea moni auā e musu e fa’aalu se tupe, e totogi sina tau. E le pine o nisi o i latou na sa auai, o loo nonofo ma ni lotofuatiaifo ta'usalaina.

      Ae e le so’ona tusilima i se tasi poo se malo, auā o le malaia e tuua’iina ai tagata uma lava, aemaise faipule ma ta’ita’i e faia tonu o le lalolagi. Ona ua faasili le tupe ma le polofiti ma le tausili ae galo ai le to'asa o le Natura lava ia. Vaganā se tagata mau'oa pei o Trump, e vaai ae le vaai, na te faafitia pea le tulaga moni o molimau vaaia. Toe o vaiaso uma e tupu ai se faalavelave faanatura i soo se itu o le lalolagi. Pe a to'atama'i le eleele, le 'ea, le vai ma le afi. O malosi’aga na e fa o loo pulea le foafoaga. O malosi’aga na faia e le Atua e tautuaina le tagata, a o na fo'i e toe faasaga mai e a'oa'i le tagata pe a galo lona tiute o se tausimea a le foafoaga.

      E manaia le faalogo atu i nisi ta'ita'i i le faama'ite o le a'oa'oina o le tau ma ona suiga i totonu o potua'oga. E lagolagoina tele se na faama'ite. O se mea tatau le manino i le fanau o le taua o le galuega tausimea, mulimuli mai ai le tekonolosi ma isi mea. Auā e leai se aogā o le telefoni pe a ma'i i le 'ea palapalā.

      Aisea le faamuamua? O fanau o ta'ita'i i latou o aiga, nuu ma malo ataeao. E le tau fesiligia itu lelei o le tatau ona inivesi ai se malo auā lona tofi fa'aauau. E le faatali se'i aulia le iunivesite ona faato'a a'oa'o lea e sina pasene itiiti o le fanau. I nisi o su'esu'ega fai i le suiga o le tau, ua iloa ai le to'atele o tagata Pasefika e leai se malamalama i lenei mataupu. Fai mai nisi o mea na e gata i saienitisi ma le ‘aufaitonu. Ae e sese sea taofi.

      E sauni lenei faasoa a o loo fonoa Suva i ta'ita'i a le Pasefika, e le tauilo o le tasi lea mataupu i le lisi o mataupu, aemaise o le fesili poo afea e liuliualo mai ai malo malolosi i la tatou tagi mo le lavea’iina. Ua tofo soo Ausetalia i le a'oa'iga, lea fo'i ua tofo Niu Sila. Faitau piliona tala le tau o le a totogi i le to’asa o le vai ma le matagi. O le tatalo, ia avea mea tutupu ma fafagu i o la ta'ita'i, e telē so la sao i le faaleoina o atugaluga o malo Pasefika i tonu fai o le lalolagi. Ua manino le fe'au, e le faailogaesea se atunuu e le faao’osala, e tutusa le tama'i motu ma se konetineta. I lenei lava vaitau, ua iloga le ogaoga o lana ta i konetineta ma malo tetele. O nisi o i latou nei o loo tausolomua le fai otaota i le fanua, le sami atoa ma le 'ea.

      Lea foi o loo ta'u se fuafuaga a le malo Iapani e sa'ati ni tone o ana otaota niukilia i le vasa Pasefika. E to'afia ni malo Pasefika o lagolagoina lea faiga, ona o le teuga o le va ma se malo mauoloa?

      O mau faavaea nei: O pole ‘aisa i matu ma saute ua faatele’a’i le liua ma suavai, alu a’i malelemo ai le lalolagi pe a leai se mea e faia i ai? Ua fa’aalia le popolega i saienitisi o le liu suavai o pole aisa e lua a o lei aulia le 2050, valo’ia e nisi le 2035 ona o le tuga o le faafitauli. E tatau ona tatou popole, auā a le o tatou, o fanau ma fanau e pagatia ai.

      I le faata'oto a Iesu i tamaiti e tafafao i malae, e atagia ai lo tatou uiga fa’aali i lenei mataupu (Mataio 11). Usu e isi le pese ma sisiva ae nofonofo lava isi. Fetagisi isi ua tafefea o latou fale i le vai ae aunoa lava se ano atu i ai o isi. A o taumafai le ’aupopoto i le tau e ta'u mai le mea moni, ae faifai isi ma faaali le uiga faaleano. Se'ia oo mai faafuase'i le malaia, a ua tuai.

      Manatua lenei mea, o suiga ogaoga o le tau, e le faasinoesea ai se malo, se tagata. Ua tatou va’ai tino ma molimau, e le o se fagogo, o mea moni lava. O le a so tatou sao e fai o ni tagatanuu? Mai le vaai faalea'oga, o soo se tapenaga lava e tali atu ai i se lu'i tele e pei o lenei, e amata i le mafaufau. Amata i mafaufau o fanau iti, auā o latou o le lumana'i o nuu ma malo mo ataeao.

       Tatou te a’oa’o le fanau i le taua o le faasao mo ataeao, le ola malamalama i le va tapuia o pule o le foafoaga, ia faataua aia tatau a manu, la’au, i’a ma le vao ituaiga o loo tatou nonofo faatasi i le ofaga e tasi. Upu moni, e sili lo tatou mana’omia o i latou nai lo latou o i tatou. A leai latou ua leai fo’i tatou.

      Tatou toe a’oina se mafaufau fou e sui ai tu ma aganuu o le faaloloto, faatautala ma le so’ona fai. Pe toe mana’omia i nei aso ni aiga e tele atu taavale i lo tagata? O ni fesili ’anoa na e ao ona taula’i i ai tomanatu a fanau. Pei lava ona manino le mataupu a le Alii, e le o le ofu a o le ola e taua (Mataio 6).

      Talitonu fo’i ua lagonaina le fe'au a le matagi ma le vai i potu fono  o malo malolosi, e manino ai i o latou ta’ita’i, a goto le va'a, e o ifo ai fo’i ma latou. O le alii ta’uta’ua o Sir Attenborough, e talitonu e mafai ona tatou suia le alavaa i le faaumatiaga, pe a gaoioi nei loa o tatou ta’ita’i, ma i tatou uma. Saunoa Attenborough, “O iai le avanoa. Atonu lava tatou te toe faafo’i mai lo tatou parataiso, tainane i se tau e lavatia e i tatou uma.”

    

​

Upu: tekonolosi - technology, suiga o le tau - climate change, faavevelaina o le kelope - global warming, aniva - galaxy

 

​